👨🏻：「親子日除咗去公園玩，有冇有意義嘅活動可以一家大細參與？」
👩🏻：「小朋友成日揮霍，真係要俾佢體驗睇吓社會貧窮人士嘅生活」
🧒🏻：「daddy, 我哋要帶呀仔參加多啲校外活動呀！」
近日，有位小學生在中心參加活動後，主動向我展示多張她跟父母與十多隻唐狗的合照，並自豪地說：「爸爸媽咪帶左我去左做狗仔義工呀！」她面露笑容地向我逐一介紹照片中的狗狗名字，亦跟我分享幫狗狗洗澡和清理便便的經驗：「姑娘，成個狗場都係大小便好臭呀！ 仲有好多狗狗都好污糟，幫佢哋沖涼啲泡泡同埋水都係黑色嫁，不過佢地好乖企定定唔會好似我Coffee 咁曳。」
「你想唔想知點解嗰度咁多狗仔，點解狗狗唔咬人咁乖呀？」學生問。
「你好似知道答案喎，不如你話比姑娘聽呀。」我說。
學生回答：「啲狗仔俾人遺棄所以先會喺嗰度住㗎！媽咪仲話好多人買左狗仔返去玩好快唔要佢地，無主人照顧所以臭崩崩囉。狗狗好乖唔咬人係想我地讚佢，俾零食佢食。」
學生續說：「姑娘，有幾隻狗狗好慘呀，俾啲壞人迫佢生bb賣俾人所以好多病，有一隻仲行唔到。」當我嘗試帶領學生反思這次做義工的經驗和當中的學習時，她說：「我要照顧coffee 等佢唔使臭崩崩。」
當她分享後，便合十雙手，用請求我的語氣說：「姑娘，你可唔可以去帶一隻狗返屋企養呀？我想佢哋有屋企。」而她臨離開中心時，更用警告的語氣跟我和同事說：「姑娘你地記得唔准去寵物店買狗呀。」，然後便匆匆離開了。
雖然只是短短15分鐘的對話，但是從學生的分享和提問中，我能看到這次「寵物義工」的體驗活動就像是學生走進社會學習的一節生活課堂，受益匪淺。父母帶她走進狗場關懷被遺棄的動物，透過義工活動中讓她明白對寵物的責任和承諾重要性，並學習照顧和關愛寵物，藉分享狗狗的經歷建立她的同理心。
香港家庭福利會日前發佈了「香港家庭幸福指數」的研究，當中發現「社會連繫」是影響家庭幸福的其中一大範疇，常與社會連繫的家庭會比較幸福。家長們，除了在學校的日常學習，家長不妨多帶領孩子與社會連繫，例如安排親子日一起參與義工服務、慈善捐款、社會團體聚會或活動、社區淨灘 、環保體驗等，藉此了解社會文化和社會現況，帶領孩子服務和接觸社會，建構幸福的家庭和建立和諧同理的社會。